महाराष्ट्र विधानसभा निवडणुकीत महायुतीचा विजय ऐतिहासिक ठरला असून, या निवडणुकीत महायुतीने केवळ प्रचारच केला नाही तर त्यासाठी काटेकोर नियोजन आणि कार्यशैली याचा देखील आदर्श घालून दिला. या यशामध्ये विरोधकांच्या निर्णयांचे आणि चुकांचे मोठे योगदान राहिले. पाहूया, निवडणुकीचा हा थरार आणि महायुतीने कसा साधला विजयाचा शिखर.
महायुतीने या निवडणुकीत मायक्रो लेव्हलवर काम केले. प्रचार यंत्रणेची पद्धतशीर आखणी करून जबाबदाऱ्या वाटून दिल्या. आरएसएसही या प्रचार मोहिमेत सहभागी झाली, ज्यामुळे मतदारांपर्यंत थेट पोहोचण्याचा यशस्वी प्रयत्न झाला. निवडणुकीच्या तोंडावर जाहीर झालेली ‘लाडकी बहिण योजना’ही यशस्वी ठरली. सरकारने योजना प्रत्यक्षात राबवून बहिणींच्या खात्यात पैसे जमा केले आणि याचा थेट परिणाम महायुतीला मतदारांचा ओढा वाढण्यात झाला.
विरोधी पक्षांनी मात्र या निवडणुकीत प्रभावी रणनीती उभारण्यात अपयश अनुभवले. उभाठा गटाने प्रचारात ‘गद्दार’, ‘चोर’, ‘खोके’ यासारख्या आरोपांवर भर दिला, ज्याचा मुख्यमंत्री एकनाथ शिंदे यांच्यावरील सहानुभूतीचा फटका उलट त्यांच्या गटालाच बसला.
शिवसेनेच्या उद्धव ठाकरे गटाने हिंदुत्वाचा विसर पडल्याचे अनेक कट्टर समर्थकांना जाणवले. सुषमा अंधारे यांना स्टार प्रचारक म्हणून निवडण्याचा निर्णयही समर्थकांना खटकला. याशिवाय, विरोधी पक्षातील नेत्यांमधील बेजबाबदार वक्तव्ये, विशेषतः संजय राऊत यांचे भाषण केवळ पत्रकारांसाठी खाद्य पुरविण्यासारखे ठरले; प्रत्यक्षात जनतेवर परिणाम करण्यास अपयशी ठरले.
काँग्रेसचे राहुल गांधी यांनी अदानी-विरोधावर एकाच मुद्द्यावर भर दिला, तर महाराष्ट्राच्या विकासाबाबत ठोस चर्चा झाली नाही. नाना पटोलेंनी मुस्लीम समाजाच्या १७ मागण्या मान्य करण्याचे जाहीर केले, ज्यामुळे हिंदू समाज एकवटला. शरद पवार यांचा या मागण्यांना दिलेला पाठींबाही महायुतीच्या पथ्यावर पडला.
याच दरम्यान, मनोज जरांगे यांच्या आंदोलनामुळे ओबीसी समाजही पहिल्यांदाच महायुतीच्या बाजूला दिसला. या सर्व घटनांमुळे महायुतीच्या विजयाचा मार्ग विरोधकांनीच सुलभ केला.
या निवडणुकीत महायुतीने निवडणूक प्रचाराचे धडे दिले तर विरोधकांनी केलेल्या चुकांचा मोठा फायदा घेतला. त्यामुळे हा विजय केवळ एक निवडणुकीचा विजय नसून, विरोधकांच्या कमकुवत धोरणांचा पराभव आहे. महायुतीची कामगिरी येत्या काळात कशी असेल, याकडे सर्वांचे लक्ष लागले आहे.
